2025, മാർച്ച് 23, ഞായറാഴ്‌ച

നേതാക്കളുടെ പരസ്പര പാര വിനയായി; രാജീവിന് തുണയായത് ഭാഷയും നിഷ്പക്ഷതയും

ഗിരീഷ് കെ നായർ

ബി.ജെ.പിയിലെ മുതിർന്ന നേതാക്കളെന്ന പഴയ മുഖങ്ങൾ അധികാരമില്ലെങ്കിലും തമ്മിൽ കണ്ടാൽ കടിച്ചുകീറാൻ നിൽക്കുന്നത് കേന്ദ്രത്തിന് മനസിലായി. പ്രകാശ് ജാവ്‌ദേക്കർ നിശബ്ദ പ്രയാണത്തിലുമായിരുന്നു. 

യാതൊരു പ്രൊഫണലിസവുമില്ലാതെ കെ. സുരേന്ദ്രൻ ഹിന്ദുക്കളെയെല്ലാം താറടിക്കുന്നു എന്ന പരാതി ആർ.എസ്.എസിൽ തന്നെ ഉയർന്നിരുന്നു. കേവലം കേന്ദ്ര ബന്ധം കാരണം വി. മുരളീധരന്റെ തണലിൽ വളർന്നു പന്തലിച്ച സുരേന്ദ്രനെതിരേ പല തരത്തിലുള്ള ആരോപണങ്ങളാണ് ഈ അഞ്ചു വർഷക്കാലത്തിലുണ്ടായത്. കേരളത്തിലെ ബി.ജെ.പി ഗ്രൂപ്പുകളിൽ അദ്ദേഹത്തിനെരായി അഭിപ്രായ പ്രകടനം ഉയർന്നത് കേന്ദ്ര നേതൃത്വത്തിന് കാണാതിരിക്കാനാവുന്നതായിരുന്നില്ല. പ്രത്യേകിച്ച് പഞ്ചായത്ത് തെരഞ്ഞെടുപ്പിൽ ബി.ജെ.പിക്ക് മുന്നേറ്റമുണ്ടാകണമെങ്കിൽ പുതിയ മുഖം വന്നേ മതിയാകൂ എന്ന അവസ്ഥ ഉണ്ടാക്കി വച്ചതുതന്നെ സുരേന്ദ്രനാണെന്നുപറയേണ്ടിവരുന്നതാണ് ഖേദകരം.

രാജീവ് ചന്ദ്രശേഖർ ഒരു സംഘപരിവാറുകാരനല്ല. എന്നാൽ സംഘപരിവാറിന്റെ ആദ്യ പേരുകാരനായി അദ്ദേഹം വന്നതിന്റെ കാരണം കേരളത്തിലെ സാഹചര്യമാണ്. വർഗീയതയിൽ ഊന്നിയുള്ള ബി.ജെ.പി പ്രചാരണം കേരളത്തിൽ സ്വാധീനം ഉറപ്പിക്കാൻ ഉതകുന്നതല്ലെന്ന് അവർക്ക് ബോധ്യമായിട്ടുണ്ട്.

ഗണപതിവട്ടം പോലുള്ള സുരേന്ദ്രന്റെ പരാമർശങ്ങൾ ഹിന്ദുക്കളുടെ തലകുനിക്കുന്നതായിരുന്നു. ഇതിനൊക്കെ തടയിട്ട് പ്രൊഫണലായുള്ള ഒരാൾ തന്നെ പാർട്ടിയെ നയിക്കാൻ വേണ്ടിയിരുന്നു.

തമിഴ്‌നാട്ടിൽ പരീക്ഷിച്ച അതേ തന്ത്രമാണ് പാർട്ടി ഇവിടെയും പരീക്ഷിച്ചത്.

തമിഴ്‌നാട്ടിൽ ഐ.എ.എസുകാരനായ അണ്ണാമലൈയെ പാർട്ടി ഏൽപിക്കാൻ കേന്ദ്രനേതൃത്വം കാണിച്ച ധൈര്യം ഇവിടെയും ഉണ്ടായി.

ബി.ജെ.പി നേതാക്കളുടെ ഒരു പ്രശ്‌നം ഭാഷ കൈകാര്യം ചെയ്യാൻ കഴിയുന്നില്ലെന്നതായിരുന്നു. അഴിമതിയും അരാജകത്വവും കൊടികുത്തി വാഴുമ്പോൾ അന്താരാഷ്ട്ര മാധ്യമങ്ങൾക്ക് അത് വാർത്തയാക്കണമെങ്കിൽ ഭാഷാ ജ്ഞാനമുള്ള പ്രതിപക്ഷ നേതാക്കളും പാർട്ടി നേതാക്കളും ആവശ്യമാണ്. 

ബി.ജെ.പിയിൽ ഇപ്പോൾ താരതമ്യേന ജൂനിയർ നേതാക്കൾക്കുമാത്രമാണ് ആഗോള ഭാഷയായ ഇംഗ്ലീഷ് വഴങ്ങുന്നത്. മലയാളം കൊണ്ട് കേരളത്തിൽ ഒന്നും നടക്കില്ല. ബ്രിട്ടാസ് പോലുള്ളവർ സി.പി.എമ്മിന്റെ മുഖമാകുന്നത് അദ്ദേഹത്തിന് പാർട്ടിയിൽ പ്രവർത്തിച്ച പാരമ്പര്യമുള്ളതുകൊണ്ടല്ല. ഫലപ്രദമായി കാര്യങ്ങൾ ഹിന്ദിയിലോ ഇംഗ്ലീഷിലോ അവതരിപ്പിക്കാനുള്ള ശേഷിയാണ്. അതുതന്നെയാണ് രാജീവിലൂടെയും പാർട്ടി ഉറ്റുനോക്കുന്നത്.

പിന്നെ, വെട്ടിച്ചു പണമുണ്ടാക്കേണ്ട ആവശ്യം രാജീവിനില്ല. ബി.ജെ.പിയിലെ പല നേതാക്കൾക്കെതിരേയും വാജ്‌പേയി ഭരണകാലത്തുണ്ടായ പെട്രോൾ പമ്പ് അഴിമതി ആരോപണങ്ങൾ ഓർമയിൽ വരുന്നു.

രാജീവ് ഒരു പ്രൊഫണലാണ്. ചെറുപ്പക്കാരിലും പ്രൊഫഷണലുകളിലും ക്രൈസ്തവ സമൂഹത്തിലും അദ്ദേഹത്തിനുള്ള ബന്ധം ചെറുതല്ല. തിരുവനന്തപുരത്ത് അദ്ദേഹം അതു തെളിയിച്ചിരുന്നു. ബി.ജെ.പി ജയിക്കുമെന്ന വേളയിൽ ഇടതുപക്ഷ വോട്ടുകൾ കൂട്ടമായി തരൂരിനെത്തിയത് നേരത്തെ തന്നെ പാർട്ടി തിരിച്ചറിഞ്ഞിരുന്നു. 

ഇന്ന് അതല്ല സ്ഥിതി. രാജീവ് തിരുവനന്തപുരത്തുകാരനായിരിക്കുന്നു. ക്രൈസ്തവ സഭകളുമായി നല്ല ബന്ധമുണ്ടാക്കിയിട്ടുള്ള അദ്ദേഹം വേഷവിധാനത്തിലും മറ്റാരെക്കാളും മുമ്പിലുമാണ്. ഇതൊക്കെ പ്രൊഫഷണലിസത്തിന്റെ നേർക്കാഴ്ചയാണ്. ഇതൊക്കെ കൂടാതെ നല്ലൊരു പി.ആർ ടീം ഇപ്പോൾത്തന്നെ അദ്ദേഹത്തിനുണ്ട്. മറ്റ് പല ബി.ജെ.പി നേതാക്കൾക്കുമില്ലാത്ത ഈ മേൻമകൾ അദ്ദേഹത്തെ ബി.ജെ.പി പ്രസിഡന്റ് സ്ഥാനത്തിന് എന്തുകൊണ്ടും അഭിമതനാണ്.

മിഷൻ കേരള എന്ന ബി.ജെ.പി അജണ്ടയുടെ മുഖമായി രാജീവ് ചന്ദ്രശേഖറെ കാണാം. കോൺഗ്രസ് മുക്ത ഭാരതം ഏതാണ്ട് പൂർത്തിയാക്കിയപ്പോഴാണ് മിഷൻ കേരളയിലേക്ക് ബി.ജെ.പി എത്തുന്നത്. ക്രൈസ്തവരിലേക്ക് ഇട്ടിരിക്കുന്ന പാലം ബലപ്പെടുന്നതിനനുസരിച്ചാവും കേരളം ബി.ജെ.പി പിടിക്കുന്നതിലുള്ള പ്രതീക്ഷകളിരിക്കുന്നത്.

പാർട്ടിയിലേക്ക് പ്രൊഫണലുകളുടെ ഒഴുക്ക് തുടങ്ങിയിട്ട് കാലങ്ങളായി. അത് പ്രതീക്ഷയിലേക്ക് കൊണ്ടെത്തിക്കേണ്ട ഉത്തരവാദിത്വമാണ് രാജീവിനുള്ളത്.

രണ്ട് പതിറ്റാണ്ട് മാത്രമാണ് രാജീവിന് സംഘപരിവാറുമായിട്ടുള്ള ബന്ധം.

എന്തു സംസാരിച്ചാലും വികസനത്തിലെത്തി നിൽക്കുന്നതാണ് അദ്ദേഹത്തിന്റെ പ്രസംഗ ശൈലി. ഇത് മോദി ശൈലിയാണെന്ന് ചൂണ്ടിക്കാണിക്കപ്പെടുന്നു. ഇതുതന്നെയാണ് മഹാരാഷ്ട്രയിൽ ഫട്‌നാവിസിന് രണ്ടാമതും നറുക്ക് വീഴാൻ കാരണം.

മുൻ കേന്ദ്രമന്ത്രിയായിരുന്ന രാജീവ് ഹൈദരാബാദിലാണ് ജനിച്ചത്. പാലക്കാട് സ്വദേശമാണ്. ബി.പി.എല്ലിലൂടെയാണ് രാജീവ് വൻ ബിസിനസുകാരനായത്. മൂന്നുവട്ടം രാജ്യസഭയിലെത്തിയ അദ്ദേഹം കേന്ദ്ര സഹമന്ത്രിയുമായിരുന്നു.


2024, ഡിസംബർ 27, വെള്ളിയാഴ്‌ച

അനാഥബാല്യത്തിന്റെ കർക്കടക കുട്ടി

 


 'ഞാൻ' എന്ന ഉത്തമപുരുഷ ബോധം കഥകളിലൂടെ മലയാളത്തിൽ അവതരിപ്പിച്ച എം.ടി അനാഥത്വം പേറിയ ബാല്യം കണ്ട 'കർക്കടക' കുട്ടിയായിരുന്നു.

നിറകൺ ബാല്യമായിരുന്നു തനിക്കെന്ന് എം.ടി പറയുമായിരുന്നു. ഒന്നര നൂറ്റാണ്ടോളം മുമ്പ് ലോക പ്രശസ്ത റഷ്യൻ ചെറുകഥാകൃത്ത് ആന്റൺ ചെക്കോവ് എഴുതിയ വാങ്ക് എന്ന കഥ, വായനയിലുടനീളം എം.ടിയെ കരയിച്ചു. ഈ കഥ വായിച്ച് പൊട്ടിക്കരഞ്ഞിട്ടുണ്ടെന്ന് ഒരു കുട്ടിയുടെതുപോലുള്ള പ്രതികരണം എം.ടിയിൽ നിന്നുണ്ടായിട്ടുണ്ടെന്ന് അറിയുമ്പോൾ ശിഥില കുടുംബവും കയ്‌പേറിയ ബാല്യവും പേപ്പറുകളിലെ അക്ഷര മഷി നീർമിഴിയാൽ എത്രയോ പടർത്തിയിട്ടുണ്ടാവുമെന്നു വ്യക്തം. ചെരുപ്പുകുത്തിയുടെ സഹായിയായ ഒൻപതുകാരനായ അനാഥ ബാലൻ, കുടുംബത്തിലേക്ക് തന്നെ തിരികെ വിളിച്ചുകൊണ്ടുപോകണമെന്ന് കരഞ്ഞപേക്ഷിച്ച് ക്രിസ്മസ് തലേന്ന് മുത്തഛന് എഴുതുന്ന കത്താണ് വാങ്കിന്റെ പ്രമേയം. 

കുട്ടികളുടെ മനസ് വായിക്കാൻ എം.ടിക്ക് ആരേക്കാളും നന്നായി അറിയാം. ഇതു കേട്ടെന്നാൽ, അനുഭവം ഗുരുവായതാണെന്ന് അദ്ദേഹം മനസിലുരുവിട്ടിട്ടുണ്ടാവും. 'നിന്റെ ഓർമയ്ക്ക്' എന്ന കഥ എം.ടിയുടെ ബാല്യത്തിന്റെ ചിത്രീകരണമായി വിലയിരുത്തപ്പെടുന്നുണ്ട്. 

കുടുംബ ഭദ്രത തകരുന്നത് നിസ്സഹായനായി നോക്കി നിൽക്കേണ്ടിവരുന്ന വിഷാദമൂകനായ കുട്ടി. പത്തോ പതിനൊന്നോ വയസുള്ളപ്പോൾ, 'കുടുക്കുകൾ വേറിട്ട് ഒരു മുഷിഞ്ഞ കാലുറ അരയിൽ കുടുക്കി നിർത്തി' നടന്ന വല്ലാത്ത വികൃതിയായ അമ്മാളു അമ്മയുടെ മകൻ വാസുവിന്റെ മനസിന്റെ നീറ്റൽ ആരും അന്ന് കണ്ടിരുന്നില്ല. മൂന്നാൺമക്കൾക്കു ശേഷം പെൺകുഞ്ഞുണ്ടാവാൻ കാത്തിരുന്ന അമ്മയ്ക്കും അഛനും കർക്കടക രാവിൽ ഭൂജാതനായ ചാവാളിച്ചെക്കനാണ് താനെന്ന് ഉൾനീറി എം.ടി കുറിച്ചിട്ടുണ്ട്. രണ്ടാം വയസിൽ ആദ്യമായി അഛനെ കണ്ടെങ്കിലും പിന്നീട് ആ കാഴ്ചകൾ മുറിയിലെ ചിത്രങ്ങളിലൊതുങ്ങി. സിലോണിൽ പോയ അഛനെ കണ്ടിട്ടില്ല, പിന്നെ. അമ്മയുടെയും ഏട്ടൻമാരുടെയും അടിയേറ്റുവാങ്ങുമ്പോൾ മുറിയുടെ മൂലയിൽ ഏകനായി ഏങ്ങുന്ന തന്നെ ആശ്വസിപ്പിക്കാൻ അഛൻ അടുത്തുണ്ടായിരുന്നില്ല. പിന്നീട്, ഒരു സിംഹള പെൺകുട്ടിയുമായി അഛൻ വീട്ടിലെത്തിയപ്പോൾ ആഹ്ലാദിച്ചെങ്കിലും അമ്മയുമായി വഴക്കിട്ട് സഹോദരിയാകേണ്ടിയിരുന്നവളുമായി അഛൻ വീട് വിട്ടുപോകുന്നത് നോക്കി നിൽക്കുമ്പോൾ ഹൃദയം നുറുങ്ങിയ ബാല്യത്തെ വിസ്മരിക്കാനാവുന്നില്ല. ഇത് എം.ടിയുടെ ആത്മകഥയുടെ ഭാഗമല്ലെന്ന് പറയാനുമാവില്ല.

അകത്ത് ചാക്കരി ചോറ് വാർത്ത വെള്ളം മകന് കുടിക്കാൻ കൊടുക്കുന്ന അമ്മ, അഛന്റെ വീട്ടുകാർക്ക് ചോറു വിളമ്പുന്നതും, ക്ലാസിലിരിക്കുമ്പോൾ വായുവിലൂടെയെത്തിയ വറവിന്റെ മണവും നാലുകെട്ടിന്റെ ഉള്ളിടങ്ങളിൽ അന്നത്തെ അത്താഴത്തിനുളള അരിക്കണക്കിന്റെ ചർച്ച കേൾക്കേണ്ടിവരുന്ന ബാലനും. ഈ ബാല്യാനുഭവങ്ങൾ എം.ടിയുടെ എഴുത്തിന് കാരിരുമ്പിന്റെ കരുത്ത് പകർന്നിട്ടുണ്ട്.

'ഒരു പിറന്നാളിന്റെ ഓർമ'യിൽ അനന്തരവൻമാർ കഞ്ഞിക്കുള്ള ഊഴം കാത്ത് മാവിൻചുവട്ടിൽ നിൽക്കുമ്പോൾ അമ്മാവനും മക്കളും വിഭവസമൃദ്ധ സദ്യ കഴിക്കുന്നതും അമ്മാവൻ്‌റെ മകന്റെ പിറന്നാളിന് സമൃദ്ധ സദ്യയാവുമ്പോൾ, തന്റെ പിറന്നാളിന് അമ്മയ്ക്ക് പൊതിരെ തല്ല് കിട്ടുന്നത് ഏതു കുഞ്ഞിന്റെ ഹൃദയമാണ് മുറിപ്പെടുത്താത്തത്. 

സ്‌നേഹത്തിനു കേഴുന്ന കുഞ്ഞുങ്ങളുടെ ഏകാന്തതയുടെ നേർച്ചിത്രമായിരുന്നു എം.ടിയുടെ ബാല്യം വരച്ചിട്ടത്.

പാതിരാവിലും പകൽവെളിച്ചം, കാലം, വിലാപയാത്ര, കുറുക്കന്റെ കല്യാണം, നുറുങ്ങുന്ന ശൃംഖലകൾ ഇവയിലൊക്കെ അഛൻ എന്നത് വിങ്ങലാകുന്ന കുഞ്ഞിനെ എം.ടി ഓർത്തെടുക്കുകയല്ലേ. ജീവിത ഏടിന്റെ പകർന്നാട്ടം ഇതിൽ വ്യക്തമാണ്.

അഛനില്യാണ്ടുണ്ടായ കുട്ടിയെന്ന കൂട്ടുകാരുടെ പരിഹാസം, പിതാവ് മറ്റൊരു വിവാഹത്തിന് മണവാളനായി പോകുമ്പോൾ അഛനെന്ന് വിളിക്കാനാകാതെ നിൽക്കേണ്ടിവരുന്ന ദുരവസ്ഥ, തന്റെ പിതാവിനെ അന്വേഷിച്ചതിന് പരിഹാസമേൽക്കേണ്ടിവരുന്നത് ... ഒടുവിൽ പരിഹസിച്ചവനെ കല്ലെറിഞ്ഞ് പ്രതികരിക്കുന്ന കുട്ടി, കുഞ്ഞു മനസ് എങ്ങനെ മാറുമെന്ന കാഴ്ചയാണ് പകരുന്നത്.

അഛനാരെന്നറിയാതെ വളർന്ന രാഘവൻ 'കരിയിലകൾ മൂടിയ വഴിത്താരക'ളിൽ അഛനെങ്ങനെയിരിക്കുമെന്നു കാണാൻ മാത്രമായി പോകുന്നതിലെത്തി നിൽക്കുന്നു അവസാനം, 'മഞ്ഞി'ലെ ബുദ്ദുവിനെ പോലെ.

ഇരുട്ടിന് ആത്മാവുണ്ടെന്ന് വിശ്വസിച്ച കഥാകാരനായിരുന്നു, എം.ടി. ഒരാൾ ഇരുട്ടിലാണെന്ന് കരുതുമ്പോഴും അയാൾക്ക് ഒരു ആത്മാവുണ്ടെന്ന് എം.ടി ഓർമിപ്പിച്ചു.

അസന്തുഷ്ട കുട്ടിക്കാലവും ചെറുപ്പത്തിലെ വായനാനുഭവവുമാണ് നല്ല എഴുത്തുകാരനെ സൃഷ്ടിക്കുന്നതെന്ന് നോബേൽ ജേത്രി ഡോറിസ് ലെസിംഗ് പറഞ്ഞത് എം.ടിയുടെ ജീവിതത്തെക്കുറിച്ചുകൂടിയായിരിക്കും.



2024, സെപ്റ്റംബർ 28, ശനിയാഴ്‌ച

അൻവർ-സി.പി.എം യുദ്ധം തെരുവിലേക്ക്



 ഗിരീഷ് കെ നായർ


തിരുവനന്തപുരം: നിലമ്പൂർ എം.എൽ.എ പി.വി അൻവർ സി.പി.എമ്മുമായി ബന്ധം അവസാനിപ്പിച്ചതായി പ്രഖ്യാപിച്ചതിനു പിന്നാലെ യുദ്ധം തെരുവിലേക്ക്.

എ.ഡി.ജി.പി അജിത്കുമാറിനെ ഉൾപ്പെടെ കൊടും ക്രിമിനലെന്ന് വിശേഷിപ്പിച്ച എം.എൽ.എ, മുഖ്യമന്ത്രിയുടെ പൊളിറ്റിക്കൽ സെക്രട്ടറിയെ കാട്ടുകള്ളനെന്നും പിണറായിയുടെ ചിരിയും പാർട്ടി സെക്രട്ടറിയുടെ പെരുമാറ്റവും പോലും അനുകരിച്ച് കളിയാക്കിയിരുന്നു. അൻവറിനെ പുറത്താക്കാൻ ഭയപ്പെട്ട സി.പി.എം നേതൃത്വം അൻവർ സ്വയമേവ ഒഴിഞ്ഞതോടെ ബന്ധം അവസാനിപ്പിച്ചതായി പ്രഖ്യാപിച്ച് രംഗത്തെത്തിയത് അത്ഭുതപ്പെടുത്തുന്നതായി. എന്നാൽ, ഡൽഹിയിൽ നടത്തിയ വാർത്താസമ്മേളനത്തിൽ അൻവറിനെതിരേ രംഗത്തിറങ്ങാനും അൻവർ വലതുപക്ഷത്തിന്റെ കൈയിലെ കോടാലിയാണെന്നും സി.പി.എം സംസ്ഥാന സെക്രട്ടറി എം.വി ഗോവിന്ദൻ പ്രവർത്തകരോട് ആഹ്വാനം ചെയ്തപ്പോൾ അത് അണികൾക്ക് സൂചന നൽകുകയാണെന്ന് വ്യക്തമായിരുന്നു. അതിന്റെ ഫലമാണ് മലപ്പുറത്തെ തെരുവുകളിൽ തൊട്ടുപിന്നാലെ കണ്ടത്. നിലമ്പൂരിലുൾപ്പെടെ അൻവറിനെതിരേ കൊലവിളിയും കോലം കത്തിക്കലുമായി സി.പി.എം പ്രവർത്തകർ തെരുവിലിറങ്ങി. എം.എൽ.എയുടെ കൈയും കാലും വെട്ടി ചാലിയാറിലൊഴുക്കുമെന്നു വരെ മുദ്രാവാക്യമുണ്ടായി. അൻവറിനെതിരേ എങ്ങനെ പ്രതികരിക്കുമെന്നറിയാത്ത അണികൾക്ക് നേതൃത്വം വടി ഇട്ടുകൊടുത്തുവെന്നുവേണം കരുതേണ്ടത്.

ആരോപണങ്ങളിൽ നിന്നു പിൻമാറാത്ത അൻവറാകട്ടെ ഇന്ന് നിലമ്പൂരിൽ പൊതുസമ്മേളനം നടത്തുമെന്ന് പ്രഖ്യാപിച്ചത് ഭയന്ന് പിന്നോട്ടില്ലെന്നതിന്റെ വ്യക്തമായ തെളിവാണ്. സി.പി.എമ്മുമായി തെരുവിൽ ഏറ്റുമുട്ടലുണ്ടാകാനുള്ള സാധ്യതയിലേക്കാണ് ഇത് വിരൽചൂണ്ടുന്നത്.

മലപ്പുറം സി.പി.എം ജില്ലാ സെക്രട്ടറി ആർ.എസ്.എസ് അനുഭാവിയാണെന്ന് അൻവർ തുറന്നടിച്ചതോടെ അതിനെതിരേ സെക്രട്ടറിക്ക് വിശദീകരണം നൽകേണ്ടിവന്നു.

പാർട്ടിക്കും നേതാക്കൾക്കുമെതിരേ അതിശക്ത പദങ്ങൾ പ്രയോഗിക്കുന്നതിൽ അൻവറിനെതിരേ സി.പി.എം അണികൾക്ക് ക്രോധമുണ്ടെന്ന് വ്യക്തമാണ്. അതുകാരണം അൻവറിന്റെ പൊതുസമ്മേളന വേദിയിലേക്ക് സി.പി.എം മാർച്ചുനടക്കാനുള്ള സാധ്യതയും പൊലിസ് പരിശോധിക്കുന്നുണ്ട്.


2024, സെപ്റ്റംബർ 1, ഞായറാഴ്‌ച

'പാപി'യുടെ കൂടെ കൂടിയ ശിവനായിരുന്നോ ഇ.പി? പിണറായി അന്ന് പറഞ്ഞു, ഇന്ന് നീക്കി

 

നടപടിക്കാധാരം ബി.ജെ.പി ബാന്ധവ വിവാദം, വൈദേകം
നീക്കിയത് പാർട്ടി സമ്മേളനം പടിവാതിൽക്കൽ നിൽക്കേ
പാർട്ടിയിലെ രണ്ടാമന്റെ രാഷ്ട്രീയ ഭാവി അസ്തമന വഴിയിൽ


ഗിരീഷ് കെ നായർ

തിരുവനന്തപുരം: 'പാപിയുടെ കൂടെ ശിവൻ കൂടിയാൽ ശിവനും പാപിയാകും'. ഇ.പി ജയരാജൻ ബി.ജെ.പിയുമായി ബന്ധപ്പെട്ടെന്ന ആരോപണം മാധ്യമങ്ങൾ ഉന്നയിച്ചപ്പോൾ വോട്ട് രേഖപ്പെടുത്തി മടങ്ങുകയായിരുന്ന മുഖ്യമന്ത്രി പിണറായി വിജയന്റെ പ്രതികരണമിതായിരുന്നു ഇത്. അന്ന്, ലോക്‌സഭ തെരഞ്ഞെടുപ്പ് കാലത്ത് കത്തിനിന്ന ഈ ചൊല്ല്, ഇന്ന് ഇ.പിയെ കൺവീനർ സ്ഥാനത്തുനീന്ന് നീക്കുന്നതിലെത്തിനിൽക്കുന്നു. സി.പി.എമ്മിലെ സമീപ കാലത്തെ ഏറ്റവും വലിയ നടപടിയാണിത്.
ഒരിക്കൽ മന്ത്രിസഭയിൽ രണ്ടാമനായിരുന്ന ഇ.പി ഇപ്പോൾ പാർട്ടിയിൽ രണ്ടാമനായിരിക്കേയാണ് കൺവീനർ സ്ഥാനത്തുനിന്ന് മാറ്റിനിർത്തപ്പെടുന്നത്. ഇതോടെ പാർട്ടിയുടെ ഏറ്റവും തലപ്പൊക്കമുള്ള നേതാവായി അംഗീകരിക്കപ്പെട്ടിരുന്ന ഇ.പിയുടെ രാഷ്ട്രീയ ഭാവി തന്നെ അസ്തമനവഴിയിലെത്തിയിരിക്കുന്നു.
ലോക്‌സഭ തെരഞ്ഞെടുപ്പ് കാലത്ത് ബി.ജെ.പിയുടെ കേരളത്തിന്റെ ചുമതലയുള്ള പ്രകാശ് ജാവ്‌ദേക്കർ ഇ.പിയെ വസതിയിൽ സന്ദർശിച്ച സംഭവമാണ് നടപടിക്കു പിന്നിലെ പ്രധാന കാരണം. ബി.ജെ.പി നേതാവ് ശോഭ സുരേന്ദ്രനും ദല്ലാൾ നന്ദകുമാറുമൊക്കെ ചേർന്ന് സി.പി.എമ്മിനെ പിടിച്ചുകുലുക്കിയ ഭൂകമ്പമായിരുന്നു ഈ വിവരം. മൂന്നുവട്ടം ഇ.പിയും ജാവ്‌ദേക്കറും കൂടിക്കാഴ്ച നടത്തിയെന്നും ബി.ജെ.പിയിൽ ചേരുന്നതുമായി ബന്ധപ്പെട്ടതായിരുന്നു കൂടിക്കാഴ്ചയെന്നും ശോഭ പറഞ്ഞതോടെ പാർട്ടി വെട്ടിലായി. ഇക്കാര്യം ഇ.പി കൊള്ളുകയോ തള്ളുകയോ വേണമെന്ന് പാർട്ടി നിലപാടെടുത്തു. തിരുവനന്തപുരത്ത് ആക്കുളത്തെ മകന്റെ വീട്ടിൽ വച്ചുനടന്ന കൂടിക്കാഴ്ച സ്ഥിരീകരിച്ച് ലോക്‌സഭ തെരഞ്ഞെടുപ്പിന്റെ അന്ന് ഏപ്രിൽ 26നു രാവിലെ ഇ.പി പ്രസ്താവന നടത്തിയത് പാർട്ടിയെ പ്രതിരോധത്തിലാക്കി. ലോക്‌സഭ തെരഞ്ഞെടുപ്പിലെ ദയനീയ തോൽവിക്ക് കാരണം ഇതാണെന്ന് പാർട്ടി വിലയിരുത്തലുപോലുമുണ്ടായി. അന്നേ ഇ.പിക്കെതിരേ നടപടി പ്രതീക്ഷിച്ചിരുന്നെങ്കിലും പല കാരണങ്ങളാൽ അത് വച്ചുതാമസിപ്പിച്ചുവെന്നുവേണം കരുതാൻ.
തെരഞ്ഞെടുപ്പിന് പിന്നാലെ നടന്ന പാർട്ടി സംസ്ഥാന സെക്രട്ടേറിയറ്റ് ഈ ആരോപണം ഇ.പിയുടെ വിശദീകരണത്തോടെ അവസാനിച്ചതായും ഇ.പിയുടെ നടപടി നിഷ്‌കളങ്കമായിരുന്നെന്ന് സംസ്ഥാന സെക്രട്ടറി ഗോവിന്ദൻ വിശദീകരിക്കുകയും പിന്നീട് ചർച്ച ചെയ്യാനായി മാറ്റുകയും ചെയ്തിരുന്നു. എന്നാൽ അന്ന് എരിഞ്ഞുതുടങ്ങിയതായിരുന്നു ആ നെരിപ്പോട്.
ലോക്‌സഭ തെരഞ്ഞെടുപ്പ് കാലത്തുതന്നെ ബി.ജെ.പി സ്ഥാനാർഥികളെല്ലാം നല്ല കഴിവുള്ളവരാണണെന്ന ഇ.പിയുടെ പ്രസംഗവും അന്ന് വിവാദമുണ്ടാക്കിയിരുന്നു. മത്സരം ബി.ജെ.പിയും സി.പി.എമ്മും തമ്മിലാണെന്നും കോൺഗ്രസുമായല്ലെന്നും ഇ.പി നടത്തിയ പ്രസ്താവനയും സി.പി.എം കേന്ദ്രങ്ങളിൽ അമ്പരപ്പുണ്ടാക്കി.
കണ്ണൂർ മൊറാഴയിലെ വൈദേകം റിസോർട്ടുമായി ബന്ധപ്പെട്ട വിവാദവും ഇ.പി.യെ പ്രതിക്കൂട്ടിലാക്കിയിരുന്നു. ഇ.പിയുടെ ഭാര്യ പി.കെ ഇന്ദിരയ്ക്കും ബി.ജെ.പി നേതാവ് രാജീവ് ചന്ദ്രശേഖറിന്റെ ഭാര്യയുടെ നിരാമയ റിട്രീറ്റും തമ്മിലുള്ള ബിസിനസ്  പങ്കാളിത്തമുള്ളതാണിതെന്ന ആരോപണവും വിവാദമായി. പാർട്ടിയുടെ ഫണ്ട് കലക്ടറെന്നറിയപ്പെടുന്ന ഇ.പി പരിപ്പുവടയുടെയു കാപ്പിയുടെയും കാലത്തുനിന്ന് ഏറെ മുന്നോട്ടുപോയിരുന്നു.
മുഖ്യമന്ത്രിക്കെതിരേ പ്രതിഷേധിച്ച യൂത്ത് കോൺഗ്രസ് പ്രവർത്തകരെ വിമാനത്തിനുള്ളിൽ വച്ച് കയ്യേറ്റം ചെയ്‌തെന്ന കേസിൽ ഇ.പിക്ക് ഇൻഡിഗോ വിമാനം യാത്രാവിലക്കേർപ്പെടുത്തിയയും വിവാദ വിഷയമായിരുന്നു.
ഒന്നാം പിണറായി മന്ത്രിസഭയിൽ വ്യവസായ മന്ത്രിയായിരുന്നപ്പോഴും ഇ.പിയെ വിവാദം പിടികൂടിയിരുന്നു. ഭാര്യാ സഹോദരിയും സി.പി.എം കേന്ദ്ര കമ്മിറ്റിയംഗവുമായ പി.കെ ശ്രീമതിയുടെ മകൻ സുധീർ നമ്പ്യാരെ കേരള സ്റ്റേറ്റ് ഇൻഡസ്ട്രിയൽ എന്റർപ്രൈസസിന്റെ എം.ഡിയായി നിയമിച്ച വിവാദത്തിനു പിന്നാലെ മുഖ്യമന്ത്രി ഇടപെട്ട് അത് റദ്ദാക്കിയിരുന്നു. ഇതിനു പിന്നാലെ അദ്ദേഹത്തിന് മന്ത്രിസ്ഥാനം രാജിവയ്‌ക്കേണ്ടിയുംവന്നിരുന്നു.
കോടിയേരി ബാലകൃഷ്ണന്റെ നിര്യാണത്തിനുപിന്നാലെ മുതിർന്ന നേതാവായ ഇ.പി പാർട്ടി സെക്രട്ടറിയാകുമെന്ന് പ്രതീക്ഷിച്ചിരുന്നെങ്കിലും തന്നേക്കാൾ ജൂനിയറായ എം.വി ഗോവിന്ദൻ സെക്രട്ടറിയാക്കിയത് ഇ.പിക്ക് കനത്ത ആഘാതമായിരുന്നു.
കമ്യൂണിസ്റ്റ് ജീവിത രീതി പിന്തുടരാത്ത ഇ.പി പാർട്ടിയുടെ നെടുംതൂണായിരുന്നു. അദ്ദേഹത്തെ നീക്കുന്നതോടെ ഉണ്ടാകുന്ന തിരയിളക്കം എവിടെ വരെയെത്തും എന്നത് പാർട്ടി പ്രവർത്തകരെ അങ്കലാപ്പിലാക്കുന്നു. പാർട്ടി ബ്രാഞ്ച് സമ്മേളനങ്ങൾ അടുത്ത ദിവസം ആരംഭിക്കാനിരിക്കുകയും പാർട്ടി കോൺഗ്രസ് പടിവാതിൽക്കൽ നിൽക്കുന്നതിനുമിടയിലുണ്ടായ നടപടി വി.എസിനെതിരേയുണ്ടായ നടപടികളുമായാണ് രാഷ്ട്രീയ രംഗം തുലനം ചെയ്യുന്നത്.



2024, ജൂൺ 25, ചൊവ്വാഴ്ച

കാലിത്തീറ്റ ഉത്പാദനം കുറവ്, ചോളം കിട്ടാനില്ല, വില കൂടിയേക്കും

ഗിരീഷ് കെ നായർ


തിരുവനന്തപുരം: നിർമാണത്തിനാവശ്യമായ വസ്തുക്കളുടെ കുറവുമൂലം സംസ്ഥാനത്ത് കാലിത്തീറ്റ ഉത്പാദനത്തിൽ കുറവ്. സർക്കാർ കാലിത്തീറ്റ നിർമാതാക്കളായ മിൽമയ്ക്കും കേരള ഫീഡ്‌സിനും പ്രധാന വസ്തുവായ ചോളം വേണ്ട രീതിയിൽ ലഭിക്കുന്നില്ല. ഇതോടെ കാലിത്തീറ്റയ്ക്ക് സംസ്ഥാനത്ത് വില വർധിച്ചേക്കുമെന്ന് ആശങ്കയുണ്ട്.

കാലിത്തീറ്റ ഉത്പാദിപ്പിക്കാനാവശ്യമായ 90 ശതമാനം വസ്തുക്കൾക്കും കേരളം അന്യസംസ്ഥാനങ്ങളെയാണ് ആശ്രയിക്കുന്നത്.

പ്രധാന ഘടകമായ ചോളം കേരളത്തിന് നൽകില്ലെന്ന് അടുത്തിടെ കർണാടകം തീരുമാനമെടുത്തത് വലിയ വാർത്തയായിരുന്നു. വരൾച്ചാ ബാധിത പ്രദേശങ്ങളിൽ നിന്ന് ജൈവ കാലിത്തീറ്റയായ ചോളം ഇതര സംസ്ഥാനങ്ങളിലേക്ക് കൊണ്ടുപോകുന്നതാണ് കർണാടക ദുരന്തനിവാരണ അതോറിറ്റി വിലക്കിയിരിക്കുന്നത്. അവിടെ കന്നുകാലികൾക്ക് കാലാവസ്ഥ വ്യതിയാനം മൂലം തീറ്റ കുറയുന്നതിനാലാണ് തീരുമാനമെന്നാണ് വിശദീകരണം. എന്നാൽ മറ്റ് സംസ്ഥാനങ്ങളിലും ഇതേ സ്ഥിതിതന്നെയാണ്. ഇത് കേരളത്തിന് ചോളം ലഭിക്കുന്നതിൽ തടസത്തിനു കാരണമാകും. കഴിഞ്ഞ 5 വർഷമായി ചോളം ഉത്പാദനം വർധിച്ചിട്ടും വിപണിയിൽ എത്തുന്നില്ലെന്നതും പ്രശ്‌നമാണ്. എത്തനോൾ നിർമിക്കാനായാണ് ഇതിന്റെ ഭൂരിഭാഗവും മാറ്റിവയ്ക്കപ്പെടുന്നത്.

മാത്രമല്ല, 30 രൂപ നിരക്കാണ് ചോളത്തിന്റെ വില. 28 രൂപയ്ക്ക് സർക്കാർ സംഭരിച്ചുവരികയാണ്. ചോളം കൂടാതെ, അരിച്ചോളം, അരി, ഗോതമ്പ്, ഓട്‌സ്, ബാർളി, പഞ്ഞിപ്പുല്ല്, ചാമ, തിന, വരക്, കമ്പു തുടങ്ങിയ ധാന്യങ്ങളും വിവിധ ധാന്യങ്ങളുടെ തവിടുമാണ് കാലിത്തീറ്റയ്ക്ക് ഉപയോഗിക്കുന്നത്.

മിൽമയ്ക്കും കേരള ഫീഡ്‌സിനും സംസ്ഥാനത്ത് ആവശ്യമായത്ര കാലിത്തീറ്റ വിതരണം ചെയ്യാനുള്ള സംവിധാനമില്ല. സ്വകാര്യ കമ്പനികളും കൂടി ചേർന്നാണ് ഇവിടുത്തെ വിൽപന നടത്തുന്നത്. സംസ്ഥാനത്ത് ആവശ്യമുള്ള കന്നുകാലിത്തീറ്റയുടെ 50 ശതമാനം നൽകാനാവുന്നുണ്ടെന്ന് വകുപ്പ് മന്ത്രി കഴിഞ്ഞ ദിവസം വിശദീകരിച്ചിരുന്നതുമാണ്. പുതിയ കാലിത്തീറ്റ കമ്പനി സ്ഥാപിക്കാനുള്ള ശ്രമത്തിലാണ് സംസ്ഥാനം. എന്നാൽ, കാലിത്തീറ്റയ്ക്കുവേണ്ട വസ്തുക്കൾ കിട്ടിയില്ലെങ്കിൽ എങ്ങനെ ഇത് സാധ്യമാകുമെന്ന ചോദ്യമുണ്ട്.

അതിനിടെ, സംസ്ഥാനത്തെ സ്വകാര്യ കാലിത്തീറ്റ നിർമാതാക്കളുടെ കാലിത്തീറ്റയ്ക്കു പകരം സർക്കാർ കാലിത്തീറ്റ മാത്രം ഉപയോഗിക്കുക എന്ന ഒരു നയത്തിലേക്ക് സർക്കാർ കടക്കുന്നതായ വാർത്തകളുണ്ടായിരുന്നു. ഗുണമേന്മയില്ലാത്ത കാലിത്തീറ്റി കഴിച്ച് ഒരു പശു ചാകാനിടയായ സാഹചര്യവും പൊറോട്ട, മരച്ചീനി ഇല, ചക്ക, ചക്കക്കുരു തുടങ്ങിയവ കഴിച്ച് പശുക്കൾ ചാകാനിടയായതും നീക്കത്തിന്റെ പിന്നിലുണ്ടെന്നാണ് സൂചന.



2024, ജൂൺ 22, ശനിയാഴ്‌ച

വേനൽചൂടിൽ നഷ്ടമായത് 450 പശുക്കൾ, ചർമ മുഴ വന്ന് ചത്തത് 800


ഗിരീഷ് കെ നായർ

തിരുവനന്തപുരം: സംസ്ഥാനത്ത് കഴിഞ്ഞ മാസങ്ങളിലുണ്ടായ കടുത്ത വേനൽചൂടിൽ 450 പശുക്കളെ നഷ്ടപ്പെട്ടതായി മൃഗസംരക്ഷണ വകുപ്പിന്റെ കണക്ക്. പശുവളർത്തൽ ജീവിത മാർഗമായി കണ്ടെത്തിയവർക്ക് ഇത് തിരിച്ചടിയായതായും റിപ്പോർട്ടിലുണ്ട്. ഈ കർഷകരെ ക്ഷീര വികസന വകുപ്പ് സാമ്പത്തികമായി സഹായിക്കാനും തീരുമാനമുണ്ട്. ഇതിനുള്ള നടപടികൾ അവസാനഘട്ടത്തിലാണെന്ന് ബന്ധപ്പെട്ടവർ അറിയിച്ചു.

വേനൽക്കാലത്ത് പശുക്കൾ ചത്തുപോകാൻ കാരണമായി വകുപ്പ് കണ്ടെത്തിയത് സംരക്ഷണത്തിൽ ഉണ്ടായ പാളിച്ചയാണെന്നാണ്. പെട്ടെന്നുണ്ടായ അത്യുഷ്ണ സാഹചര്യം നേരിടാൻ മനുഷ്യന് കഴിയാൻ ബുദ്ധിമുട്ടായതുപോലെ മൃഗങ്ങളെ സംരക്ഷിക്കുന്നതിലും പാളിച്ചയുണ്ടായി. അതുകൊണ്ടുതന്നെ വരും വർഷങ്ങളിൽ ഈ അപകടമുണ്ടാകാതിരിക്കാൻ കർഷകരെ
ബോധവൽക്കരിക്കുമെന്ന് അധികൃതർ അറിയിച്ചു.

കൊവിഡിനു പിന്നാലെ പശുക്കളിൽ പടർന്നു തുടങ്ങിയ ചർമ മുഴ രോഗം കാരണം 800 പശുക്കളെ കർഷകർക്ക് നഷ്ടമായെന്നും കണക്കുകളിൽ പറയുന്നു. ഇത് കർഷകരെ കടക്കെണിയിലും സാമ്പത്തിക നഷ്ടത്തിലും ആക്കിയിട്ടുണ്ടെന്നും വകുപ്പ് കണ്ടെത്തിയിട്ടുണ്ട്. ഇവർക്കും സാമ്പത്തികമായി സഹായം നൽകാനുള്ള നടപടികൾ അന്തിമ ഘട്ടത്തിലാണെന്ന് വകുപ്പുമായി ബന്ധപ്പെട്ടവർ പറഞ്ഞു.

കറവപ്പശുക്കൾക്ക് മുപ്പതിനായിരം, കിടാരികൾക്ക് പതിനാറായിരം, ആറുമാസത്തിൽ താഴെപ്രായമുള്ള പശുക്കുട്ടിക്ക് അയ്യായിരം എന്നീ ക്രമത്തിലാകും നഷ്ടപരിഹാരത്തുകയെന്നാണറിയുന്നത്.

2019ന്റെ അവസാനം കണ്ടെത്തിയ ചർമ മുഴ രോഗം കിടരികളെയും പ്രായം ചെന്ന പശുക്കളെയും ഒരുപോലെ ബാധിക്കുന്നു. പശുക്കളുടെ പ്രത്യുത്പാദനത്തെയും പാലുൽപാദനത്തെയുമെല്ലാ ഇത് ബാധിക്കുമെന്നതിനാൽ ക്ഷീര കർഷകർ ഏറെ ബുദ്ധിമുട്ട് അനുഭവിക്കുന്നു. നിലവിൽ ഈ രോഗത്തിന്റെ മൂന്നാം തരംഗമാണ് സംസ്ഥാനത്തുള്ളതെന്നാണ് മൃഗസംരക്ഷണവകുപ്പ് വിലയിരുത്തുന്നത്.

ചർമ മുഴ രോഗമുള്ള പശുക്കളുടെ പാൽ ഉപയോഗിക്കുന്നതിൽ കുഴപ്പമില്ലെങ്കിലും കിടാരികൾ കുടിച്ചാൽ രോഗം പകരും.

ഗുജറാത്ത്, രാജസ്ഥാൻ തുടങ്ങി ഏഴ് സംസ്ഥാനങ്ങളിൽ ചർമ മുഴ ഭീഷണിയുണ്ട്. രാജ്യമാകെ എൺപതിനായിരം പശുക്കൾ നഷ്ടപ്പെട്ടതായാണ് കണക്കുകൾ.


2024, ജൂൺ 21, വെള്ളിയാഴ്‌ച

വിഴിഞ്ഞം തുറമുഖം രണ്ടും മൂന്നും ഘട്ടം: പബ്ലിക് ഹിയറിങ് കഴിഞ്ഞു, തുരങ്ക റെയിൽപാതയില്ലാത്തത് തടസമാകില്ല



ഗിരീഷ് കെ നായർ

തിരുവനന്തപുരം: വിഴിഞ്ഞം തുറമുഖത്തിന്റെ ഒന്നാം ഘട്ടം ഏതാണ്ട് പൂർത്തിയായതോടെ രണ്ടും മൂന്നും ഘട്ടങ്ങളുടെ നിർമാണത്തിലേക്ക് കടന്ന് സർക്കാരും അദാനി ഗ്രൂപ്പും. രണ്ടും മൂന്നും ഘട്ടങ്ങളാണ് പൂർത്തിയാകാനുള്ളത്. ഇതിന്റെ ആദ്യഘട്ടമായ പബ്ലിക് ഹിയറിംഗ് ഇന്നലെ പൂർത്തിയായി. പാരിസ്ഥിതികാനുമതി ലഭ്യമാക്കാനുള്ള നടപടികളാണ് ഇനിയുള്ളത്. വിഴിഞ്ഞം, കോട്ടുകാൽ പ്രദേശത്താണ് പോർട്ട് മാസ്റ്റർ പ്ലാനിലുള്ളത്.

ആദ്യഘട്ടത്തേതിൽ നിന്നു വിഭിന്നമായി രണ്ടും മൂന്നും ഘട്ടം നിർമാണം വിഴിഞ്ഞം മുതൽ പൊഴിയൂർ വരെ തീരദേശത്ത് പാരിസ്ഥിതിക ആഘാതമുണ്ടാകുമെന്ന ആശങ്ക പബ്ലിക് ഹിയറിംഗിൽ ഉയർന്നിട്ടുണ്ട്.

കഴിഞ്ഞ ദിവസം കസ്റ്റംസിന്റെ പോർട്ട് പദവി കിട്ടിയതോടെ വിഴിഞ്ഞം തുറമുഖത്ത് ഇനി കയറ്റിറക്കുമതി നടത്താനാവും. 

അടുത്ത
മാസത്തോടെ ട്രയൽ റണ്ണും ഓണക്കാലത്ത് ഉദ്ഘാടനവും നടത്താനുള്ള നീക്കമാണ് ഇപ്പോൾ നടക്കുന്നത്.

അതേസമയം പോർട്ടിലെത്തുന്ന കണ്ടെയ്‌നറുകൾ ദേശീയ പാതയിലേക്ക് എത്തിച്ച് കൊണ്ടുപോകണമെങ്കിൽ അവിടേക്കുള്ള റോഡ് പണി പൂർത്തിയാകേണ്ട

തുണ്ട്. ഇതിൽ ഇപ്പോഴും കാര്യമായ പുരോഗതിയില്ല. 

അതിനിടെ തുരങ്ക റെയിൽ പാതയ്ക്ക് കേന്ദ്രാനുമതി ലഭിച്ചിരുന്നു. ഇതിന്റെ നിർമാണവും എന്നു തുടങ്ങാനാവുമെന്ന പ്രശ്‌നവും നിലനിൽക്കുന്നുണ്ട്.

എന്നാൽ റെയിൽ-റോഡ് മാർഗം കണ്ടെയ്‌നർ കൊണ്ടുപോകേണ്ട അവസ്ഥ ഉണ്ടാവില്ലെന്ന് പോർട്ട് അധികൃതർ പറയുന്നു.

കപ്പലുകളിൽ എത്തുന്ന കണ്ടെയ്‌നറുകൾ മറ്റൊരു കപ്പലിലേക്ക് മാറ്റുന്നതിലൂടെ കടൽമാർഗം ചരക്ക് കടത്താനാകുമെന്നുമാണ് വിശദീകരണം.

കണ്ടെയിനറുകൾ കരയിലേക്ക് മാറ്റിയശേഷം മറ്റൊരു കപ്പലിലേക്ക് മാറ്റി കൊണ്ടുപോകുന്നത് റോഡിലൂടെയും റെയിൽവേയിലൂടെയും കൊണ്ടുപോകുന്നതിലെ വൻ ചെലവും കുറയ്ക്കാൻ സാധിക്കുമെന്നും അധികൃതർ ചൂണ്ടിക്കാട്ടുന്നു.

അതേസമയം, നാവിക സേനയുടെ ഹൈഡ്രോഗ്രാഫിക് സർവേ നടത്തുന്ന കപ്പൽ ഇവിടെയെത്തിയിരുന്നു. ഇതോടെ തന്ത്രപ്രധാനമായ തുറമുഖമായി വിഴിഞ്ഞം മാറുന്നതോടെ വലിയ യുദ്ധക്കപ്പലുകൾക്കും സർവേ കപ്പലിന്റെ നിർദേശങ്ങളനുസരിച്ച് തുറമുഖത്ത് അടുക്കാനാകും.